كيك شاتوه

كيك شاتوه او كيك الشوكولاتة اللذيذ

المكونات

الصوص الاساسي

كوب لبن

نصف كوب زيت 

كوب كاكاو خام غامق

كوب ونصف سكر

و4 ملاعق لبن جاف (حسب الرغبة مش اساسي بس انا بضيفه عشان يكون الصوص سميك شوية صغيرة وسهل اتحكم فيه)

كيس فانيليا

الكيك

عدد 4 بيضات

و2 كوب ونص دقيق

كوب سكر

و3 ملاعق زبد او سمن

كيس كيك شيف - انا بحبه لانه بيدي طراوة وملمس للكيك زي الجاهز لان فيه محسنات لو مش عايزة كيك شيف استخدمي 2 م ك ونص بيكنج باودر

فانيليا

في الصورة هنا بنجهز الصوص الاساسي

خلطنا مكونات الصوص الاساسي مع بعضها

لبن وكاكاو ولبن باودر - حسب الرغبة

هنا ضيفت الزيت و السكر 

خلطتهم كويس لحد ما بقى قوام صوص سائل الى حد ما

دة الصوص الاساسي

ناخد من الصوص دة نملى مج ونشيله على جنب في التلاجة عشان يمسك شوية

مج الصوص دة اللي حنزوق بيه الكيكة

والصوص دة على فكرة ينفع لتزويق اي كيك شوكولاته 

شيلنا مج من الصوص 

باقي الصوص حيبقى اساس الكيك

نبتدي بقى نستخدم مكونات الكيكة نفسها

نضيف بقى عليه البيض و الفانيليا و السكر و نخلط

ونضيف الدقيق (يفضل يكون منخول) والبيكنج باودر او كيس كيك شيف

لو بتحبي تستخدميه وانصحكو بيه جدااااااا

ونضيف السمنة او الزبدة

نخلط كويس 

لما بضيف الدقيق بقلب بمعلقة الاول عشان المضرب بيخلي الدقيق يطير في كل حتة 

بعد كدة بالمضرب نخلط كويس لحد ما كل حاجة تمتزج كويس 

نجهز قالب مدهون 

انا الصينية دي تعتبر كبيرة الى حد ما 

ممكن تستخدمي حاجة ضيقة شوية لو عايزة الكيكة تطلع عالية

انا بتطلع معايا في القالب دة ارتفاعها متوسط لانه واسع شوية 

اللي لقيته بقى ساعتها

دخلتها فرن متسخن على درجة 180

بعد ما تدخليها ب 10 دقايق نوطي الفرن ل 160

خليها في الرف الوسط

اخدت ساعة الا ربع معايا 

عموما متفتحيش ابدا تبصي عليها قبل مرور نص ساعة على الاقل

تغرزي سكينة فيها لاقتيها نضيفة اطفي الفرن و سيبيها جواه لحد ما تهدى

بعد كدة خرجيها تبرد عشان نحط الصوص 

لما الكيكة تبرد خالص 

نطلع مج الصوص من التلاجة ونبتدي نفرده على الكيكة

قوامه مناسب جدا للفرد

لا سايل ولا جامد 

لو عايزة يبقى جامد زي الجناش الكريمي

ممكن تضربي معاه 3 ملاعق كريم شانتيه باودر 

بالنسبة ليا القوام كان مناسب

كمان هو تغطية انيقة لانه لامع اوي 

تمام كدة نقطع و نقدم بقى

طعمها خطيير 

وشكلها انيق اوي زي كيك كوستا

لازم تجربوها 

وادي طبق كمان

لو عايزة تعمليها تورتة 

اعمليها في قالب ضيق شوية عشان تكون عالية

اقسميها بالعرض نصين واحشيها كريمة 

او ممكن تعملي مقدار اضافي من الصوص دة بس تقللي الكمية

وتحشي بيها بين الطبقتين بالاضافة للتغطية الخارجية حتبقى تحفة جدا