سينامون روول مع البيكان المسكر

سينامون روول مع البيكان المسكر

Cinnamon Rolls with Candied Pecans

هذي الوصفة هي للسينامون رول بالمكسرات

تقدرون تستخدمون نفس الوصفة بالضبط بنفس الخطوات بالضبط لو بغيتوا تسوونها ساده

بس أتركوا المكسرات و الباقي نفس الشي

العجينة اللي هنا عجينة جدا دسمة، تقريبا أقرب مالها البريوش

هي مليانه سكر ودهن وبيض وهذا واحد من أسرار النكهة هنا

كثير ناس يسوون السينامون روول بأي عجينة مرميه عنده

ويشكلها بشكل حلزوني ويسميه سينامون رول و النتيجة دايما مخيبة للآمال

المقادير

للعجينة

عدد 4 صفارات بيض على حرارة الغرفة

بيضة كاملة على حرارة الغرفة

ربع كوب سكر

و6 ملاعق كبيرة زبدة مذوبه - تقريبا أصبع إلا ملعقة كبيره

و170 جرام لبن كامل الدسم على حرارة الغرفة - تقريبا 3/4 كوب

و3 أكواب طحين

instant yeast ملعقتين صغار خميرة 

و1/3 ملعقة صغيرة ملح

للحشوة 

كوب سكر بني - يفضل فاتح

ملعقتين كبار قرفة يفضل لو مطحونه جديده

رشة ملح

ملعقتين كبار زبدة مذوبة

وصفة من البيكان المسكر أو كوب بيكان عادي محمص

التغطية 

وصفة من فروستنج الكريم تشيز

هذي العجينة جدا متعبة على الخميرة وعشان كذا مهم إن كل شي يكون على حرارة الغرفة عشان تنفش بسهولة

المقصود باللبن هنا اللبن العادي اللي نعرف يعني المراعي - الصافي أو غيرهم موب الحليب 

بخصوص القرف إسم الأكلة سينامون روول أو سينامون بن

Cinnamon Bun

يعني خبز القرفة - القرفة هي أهم شي هنا فمهم إننا نستخدم أحسن نوع قرفة موجود إذا نبغى أفضل طعم 

الأفضل إني أشتري أعواد قرفة جيدة

و أطحنها في البيت لهذي الوصفة هذا راح يعطينا أفضل نكهة قرفة ممكنة

عاليسار القرفة الأندونيسيه وعاليمين قرفة سيلانية ممتازة

الطريقة

للعجينة

في صحن خلط أو في عجانة نخلط صفار البيض مع البيضه و اللبن و السكر و الزبدة إلين يعطوننا خليط متجانس

نحط نص الطحين و نحط الخميرة و الملح

ونبدأ نخلط إلين يعطينا عجينة جدا رطبة

نحط الخطاف حق الخبز

ونضيف باقي الطحين ماعدا 3/4 كوب تقريبا

(يمكن نحتاجها يمكن لأ)

ونبدأ نعجن على سرعة خفيفة (أو ممكن نعجن باليد) 5 دقايق تقريبا

بعد 5 دقايق نشوف العجينة

العجينة مفروض تكون لينة ورطبة بس ما تلصق باليد إذا لمسناها

إذا لقينا العجينة تلصق نزيد شوي طحين ونكمل عجن إلين توصل للمرحلة اللي قلت

نكمل عجن 5 دقايق زيادة تقريبا بعدين نشيل العجينة من العجانه ونكورها

ندهن صحن بشوي زيت ونحط العجينة فيه

ونغطي الصحن بنايلون ونترك العجينة تتخمر على حرارة الغرفة إلي ان يتضاعف حجمها تقريبا ساعتين إلى 3 ساعات

ندهن صينية بايركس كبيرة

(يعني تقريبا 13 في 9 إنش أو أي شي يكفي إنه يشيل تقريبا 10 حبات سينامون رول) 

بشكل جيد بزبدة

للحشوة

بسكين نقطع البيكان المسكر قطع كبيره

في صحن صغير نخلط السكر البني و القرفة و الملح ونخليهم عالجنب إلين نكمل العجينة

نرش الطاولة حقت الشغل بشوي طحين بعدين نحط العجينة عليها

نفرد العجينة بالنشابة بحيث تكون مستطيلة تقريبا

نحاول قدر الإمكان العجينة تكون مستطيلة بعد الفرد لأن هذا بيعطينا قطع مرتبة أكثر

نفرد العجينة بحيث يكون سمكها حوالي 4-5 ملليمتر وأبعادها تقريبا 18 في 12 إنش

الحين ندهن العجينة بشكل جيد بالزبدة الذايبة

نبقي 1 سم تقريبا من الطرف العلوي بدون دهن عشان نلصق العجينة بعدين

نوزع خليط السكر و القرفة فوق الجزأ المدهون من العجينة بالتساوي

وبعدين نرش البيكان المقطع فوقهم

نرص الحشوة عالعجينة بيدنا بشكل خفيف عشان تلصق

الحين نبدأ نلف العجينة

نبدأ نلف العجينة من الطرف القريب لنا من الوسط بيديين

ونحاول نخلي اللفات ضيقة قدر الإمكان

الحين لازم نلصق الفتحة حقت العجينة عشان ما تنفرط علينا

ناخذ الطرف الأخير المفتوح من العجينة

ونلصقة بالعجينة نفسها بإننا نضغط عليه بأصابعنا زي الصور

العجينة قبل التقفيل

طريقة تلصيق طرف العجينة

الحين نشوف العجينة ونحاول نعدل سماكتها بيديننا بحيث تكون كلها تقريبا نفس السماكة

الحين للتقطيع : بإستخدام سكين خبز

نقطع نهايات العجين

(مش شرط بس شكلها مش حلو)

نقسم العجينة نصين بالسكين بعدين نقسم كل نص 5 قطع متساوية السماكة بحيث يكون عندنا 10 قطع

ممكن نقطع العجينة إلى 12 قطعة لو حابين بس أشوف 10 تعطي السماكة المثالية برأيي

نرص القطع على صينية البايركس اللي دهنا أول

بعدين نغطي الصينية بنايلون وندخلها الثلاجه طول الليل أو إلى 16 ساعة لو نبي

ثاني يوم نطلع الصينية من الثلاجه ونحطها في فرن بارد

نحط في الرف اللي تحت الصينية صينية ثانيه ونملاها ميه مغليه

بعدين نقفل الباب ونترك العجينة نص ساعة تقريبا في البخار البخار هنا بيسوي شيين

أول شي هو بيدفي العجينة وبيرجع الخميره للشغل من جديد

ثاني شي هو بيرطب وجه العجينة

وهذا يعني إن الوجه بيكون رطب وماراح يتصلب بسرعه في الفرن وهذا يعني نفشة أكبر في الفرن

هذي النفشة في عمل الخبز يسمونها نفشة الطاولة 

Bench Proof

ووظيفتها تنفش الخبز قبل يدخل الفرن للنفشة الأخيرة اللي يسمونها نفشة الفرن

Oven spring

بعد نص ساعة نطلع الصياني من الفرن ونشغل الفرن ل 350 فهرنهايت

بنلاحظ إن وجه العجينة جدا رطب وإن العجينة نفشت كثير تقريبا للضعف

شكل الروول بعد حمام البخار

بعد ما يحتر الفرن ندخل الصينية الفرن

ونخليها إلين تتلون وتصير ذهبية من الأطراف (يعني مش بس من فوق) بتاخذ تقريبا 25-30 دقيقة

لو عندكم ميزان حرارة فوري هو أفضل شي للتأكد من إستواء الخبز

طلعوا الصينية بعد ما توصل الحرارة الداخلية ل 190 فهرنهايت

الحين و السينامون روول حار ندهن الحبات بالتغطية عشان تذوب وتسيح عالأطراف

أحب أقدم السينامون روول مع زيادة صوص عالجنب أحطه في المايكروييف إلين يصير سايل شوي