وصفات - فى اول الصفحه

الكنافه بالكريمه



وصفات الشيف ايمن العطار

المقادير

نصف كيلو كنافه
معلقه كبيره سكر بودره
كوب سمنه
شربات للكنافه وده بيكون دايما تقيل يعنى 2 كوب سكر مع 1 كوب ميه
2 كوب لبن حليب
2 معلقه كبيره نشا

طريقه الكريمه

هنحط كوب ونص من اللبن على النار يغلى وبعدين ندوب النشا فى نص كوب اللبن اللى فاضل عندك
وننزل بيهم على اللبن لحد مايربط معاكى ويديكى كثافه الكريمه المطلوبه
وهنا انا مضيفتش سكر خالص على الكريمه بتكون اجمل واحلى
عشان الشربات بتاع الكنافه لسه هنضيفه ومش تبقى مسكره اوى وتجذع النفس

الطريقه

هنقطع الكنافه قطع صغيره جدا واحط عليها معلقه السكر البورده
وانا بقطعها ومعلقه من السمنه والسكر البودره انا بحطه عشان الكنافه تاخد لون دهبى
وبعد كده فى صينيه مدهونه بسمنه
هحط نصف كميه الكنافه واكبسها كويس جدا لازم الكنافه
هنا تكبس كويس جدا ممكن تحطى عليها صينيه تانيه وتضغطى عليها
بعد كده هتحطى الكريمه وتوزعيها كويس على الكنافه وبعدين طبقه الكنافه التانيه
وهنا تكبسى الكنافه براحه عشان الكريمه مش تخرج من اجناب الصينيه
وبعدين نحط السمنه عليها وندخلها الفرن على درجه حراره 150 لمده 20 دقيقه
وبعدين تخرجيها من الفرن وتصفى السمنه اللى هتفيض فيها
وتقلبيها على الوجه التانى وتدخليها لمده من 5 الى 10 دقائق تانى
لحد ما تاخد لون وبعدين تخرج من الفرن وتسقيها بالشربات
وتجمليها زى مانتى بتحبى بالفاكهه او بالمكسرات وتقدميها بارده بالهنا والشفا

إرسال تعليق

0 تعليقات