ملاحظات عن وجبات المدرسة

Posted by Amira Fayed on February 16, 2016 with No comments


كل سنة و انتم طيبين
مع بداية الدراسة يارب ان شاء الله تكون سنة خير على اولادنا جميعا 
 دى مجموعة افكار فيها تنويع للمدرسة ان شاء الله تعجبكم

 ودي مجموعة ملاحظات عن وجبات المدرسة


 حاولي تختاري اللانش بوكس اللي بتكون متقسمة من جوه
لانها بتكون احسن علشان وجبات الطعام اللي معاهم للمدرسة ما تختلطش مع بعض 


لو لانش بوكس مش متقسمة - استخدمي الاكياس البلاستيك الصغيرة
يعني كيس للساندويتش
و كيس مثلا لاصابع الخيار او الجزر لو واخدهم معاه المدرسة 


خدي الافكار من الاولاد بيحبوا ايه للمدرسة
و اعرضي عليهم افكار جديدة ممكن كب كيك مثلا او معجنات و ممكن في الاجازة يحضروها معاكي
و تحتفظي بيها في علب مقفولة في الثلاجة
و تبقى على التسخين الصبح قبل ما يروحوا المدرسة 

الفاكهة او الخضار زي الخيار او الجزر ممكن نقطعها على شكل اصابع
و تبقى وجبة صحية و خفيفة معاهم للمدرسة 

حاولي ما تحطيش ساندويتشات يكون فيها طماطم او مايونيز
و كمان تجنبي بقدر الامكان الميلك شيك و العصائر الطبيعية
لان الحاجات دي ممكن تبوظ بسرعة 

ممكن تغيري في اشكال الخبز اللي بياخده معاه المدرسة
يعني ممكن مرة توست مرة فينو او خبز عربي او شامي او ممكن
لو بتعملي في البيت حاجة زي عيش الشاورما 


مهم كمان نراعي سن الطفل لما نختار خبز الساندويتشات يعني لو سن 6 سنوات او اقل
بلاش نستخدم التوست المحمص او خبز الباجيت
الاحسن انواع الخبز الطري

  لو السن اكبر من 10 حاولي تنوعي اكتر في اختيار وجبات المدرسة
علشان يقللوا بقدر الاماكن من الساندويتشات او الحلويات الجاهزة اللي ممكن تكون موجودة في المدرسة 


لو اخترتي تعملي ساندويتشات فيه لحوم او دجاج او تونة
الافضل تعمليها من بالليل
و تدخليها الثلاجة علشان تحتفظ ببرودتها اطول فترة ممكنة 
و تحطيها قبل ما ينزل علطول للمدرسة


ما تحاوليش تحطي اي حاجة في اللانش بوكس الاولاد مش بيحبوها او تجربي حاجة جديدة هو ما دقهاش قبل كده 
ممكن تجربي الاول في البيت اصناف جديدة علشان توسعي دائرة اختياراتك

قطعي الوجبة إلى قطع صغيرة 
 يعني لو خضار او فاكهة تتقطع اصبع مثلا علشان تكون اسهل في الاكل 

دايما في الانش بوكس خلي معاهم مناديل ورقية
او مناديل مبللة ( الويبس ) علشان تنظيف اليد بعد الوجبات 

الماء او العصير اساسي معاهم علشان المجهود المبذول في المدرسة طول اليوم


الاحسن تجهيز محتويات اللانش بوكس كلها من بالليل
و تكون جاهزة انها تتحط في اللانش بوكس قبل النزول للمدرسة علطول

Reactions: