كيكة الآنجل فوود

كيكة الآنجل فوود
Angel Food Cake


كيكة الأنجل فوود أو طعام الملائكة عبارة نوع من أنواع الكيك الأسفنجي
هذي الكيكة تتميز عن كل أنواع الكيك الثانيه
بإنه مافيها أي نسبة دسم 0٪ ولا شي
ومع هذا الكيكة خفيفه ولينه إذا تسوت صح
سبب التسميه هو طبيعة الكيكة البريئة إن صح التعبير
كونها خفيفه وبيضاء وبنفس الوقت بدون أي دسم
في المقابل فيه كيكة ثانيه اللي هي تقريبا عكس هذي الكيكة
وهي كيكة الديفل فود أو طعام الشياطين ههه
devils food cake
اللي هي عبارة عن كيكة شكولاته دسمه مره و ثقيلة
عكس كل شي تمثله هذي الكيكة


الكيكة تعتبر كيكة إسفنجية
sponge cake
وهذا يعني إنها مرفوعة ببيض
الكيكة مافيها أي مواد رافعة غير بياض البيض
وعشان كذا مهم إن المرانج اللي نسويه يكون مضبوط صح
وشلون تنفش الكيكة بدون مواد رافعة
السر في الهواء المحبوس داخل المرانج
الهواء داخل المرانج يتمدد في الفرن
وهذا يرفع الكيك ويخليه خفيف نفس العمليه
هي اللي ترفع السوفليه والكيكات الإسفنجية الثانيه
بياض البيض فيه مشكلة
وهو إنه ينشف ويصير حجر إذا ماكان معه دهن
وهنا يجي دور السكر اللي يلين الكيك
ويخليه رطب حتى بعد ما يطلع من الفرن

المقادير

كوب ونص سكر مطحون
ربع ملعقة صغيرة ملح
كوب طحين كيك منخول
و12 بياض بيض على حرارة الغرفة بدون أي أي نقطة صفار
و1/3 كوب ميه دافيه
ملعقة صغيرة فانيلا سايلة أو عود فانيلا زي ما سويت أو أي خلاصة نكهة تحبون
ملعقة صغيرة ونص كريمة ترتار


ملاحظات

السكر هنا لازم سكر بودرة ماينفع السكر العادي

طحين الكيك ضروري لهذي الوصفه
طحين الكيك هو طحين مصنوع من قمح لين أو قمح صيفي
ويجي مطحون أنعم و مبيض
و فيه بروتين أقل من الطحين العادي أو طحين الخبز
البروتين هو اللي يخلي الكيك قاسي
وكون طحين الكيك فيه بروتين أقل هذا يخليه يعطي الكيك ليونه أكثر
إذا مالقيتوا طحين كيك تقدرون تسوون شي قريب في البيت
بإنكم تشيلون من كل كوب طحين ملعقتين كبار وتبدلون بدالها نشا ذرة

كريمة الترتار بعد مهمه هنا
كريمة الترتار صح بتثبت المرانج
بس فايدتها الحقيقيه هنا هي إنها تخلي الكيكة حمضيه شوي
وبكذا ما تتحمر أسرع من اللازم وتنحرق قبل ما تستوي من داخل

الكيكة بسويها بالفانيلا بس تقدرون تستخدمون أي نكهة ثانيه تحبون
تقدرون تحطون أي خلاصة نكهة زي البرتقال مثلا
أو قشر حمضيات وتسوون الكيكة بنكهات ثانيه

بنحتاج بعد صينية كيك اللي فيها عود في الوسط واللي لها قاعدة متحركة
الصينية هذي بهذا الشكل ضروريه لهذا النوع من الكيك مافيه أي بديل
الصينية هذي يسمونها أحيانا
angel food cake pan


الطريقة

نسخن الفرن على 350
ننخل الطحين مع الملح ونص السكر في صحن
نخلط الميه مع بياض البيض و كريمة الترتار
ونسوي فيهم مرانج فرنسي بباقي السكر
إلين يوصل مرحلة الرؤوس المتوسطة بس
نطعم المرانج بالفانيلا



بعد ما نسوي المرانج ننخل نص خليط الطحين على المرانج
بعدين نخلطة شوي شوي بإستخدام أعرض ملعقة عندنا
مهم جدا هنا إنكم تخلطون شوي شوي
عشان ما نطيح المرانج ويكون الكيك خفيف وهش
بعد ما ينخلط شوي ننخل النص الثاني من الطحين
ونكمل خلط إلين يتجانس الخليط



الحين ننقل خليط الكيك لصينية الكيك بدون ما ندهن الصينية بأي دهن
نستخدم ملعقة كبيره أو مغرفه
وننقل الخليط بالملعقة للصينية شوي شوي
بعد ما تصبون الخليط لا تساوونه بملعقة ولا شي خلوه زي ماهو
لا تصبون الخليط زي ما تسوون مع أنواع كيك ثانيه
الهدف هنا هو إننا ما نفقع الفقاعات اللي في الخليط
وهذا بيخلي الكيك ناشف



لاحظوا إني قلت ما ندهن الصينية
هذي العملية ضروريه لهذا الكيك
الكيك صح راح يلصق في الصينية
وهنا الهدف الكيك يحتاج شي يتمسك فيه
وهو ينفش ولو دهنا الصحن الكيك ماراح ينفش
وبكذا الكيك بيطلع ناشف
الكيك هذا جدا هش وسهل يطيح
وهنا يجي دور العامود اللي في النص كونه يوفر شي
يمسك هيكل الكيك إلين ما يتصلب



ندخل الكيكة الفرن إلين يطلع منها عود نظيف 35 دقيقه تقريبا
بدون ما نفتح باب الفرن قبل هذا الوقت
بعد ما تستوي نطلعها من الفرن بعدين نقلبها على شبك تبريد
ونخليها تبرد بالمقلوب ساعة ونص عالأقل بدون ما نطلعها من الصينية



الكيكة أول ما تطلع من الفرن بتكون هشة مره
ولو خليناها تبرد بوضعها الصحيح
( يعني مش مقلوبه )
إحتمال كبير تطيح علينا
وعشان كذا مهم إنكم تبردونها وهي مقلوبه



نحط عليها الشبك عشان نقلبها



وبعد مانقلبها نسبها شويه عشان تفك من القالب



بعد ما تبرد نفك الأطراف بسكين حاده ونحيفة
بعدين نشيل الجوانب حقت الصينية
بعدين بنفس السكين نفك القاعدة عن الكيكة شوي شوي


وبس هذي الكيكة إذا جيتوا تقطعون الكيكة
أستخدموا سكين خبز السكاكين العاديه إحتمال تضغطها بقوة

الكيكة تنحفظ على حرارة الغرفة يومين إلى ثلاث أيام تقريبا
بشرط تتغلف بشكل جيد بنايلون عشان ما تنشف

قدموها مع كوليه فواكه أو أي صوص ثاني تحبونه