وصفات - فى اول الصفحه

دجاج كنتاكي - أرز الريزو




المقادير


فرخة كاملة (حوالى 2 كيلو جرام) مقطعة اللى ثمانى قطع
و1/2 كيلو فيلية صدور فراخ
عبوة لبن رايب (1/4 لتر) ممكن المراعى
دقيق ابيض فاخر
ملح
فلفل اسمر حب
قرنفل مسمار مش مطحون
شطة
بابريكا
حقنة
مياة مثلجة
بصل بودر
ثوم بودر
جنزبيل بودر
اعشاب : مردقوش – زعتر – روزمارى – طرخون – ورق لورا – جنزبيل طازج
سكر
ملعقة صغيرة خل ابيض
FRYER مقلاة او كما تدعى


الطريقة

جهزى الفرخة والحقنة ومعجون الشطة معجون الشطة دة هتعملية ازاى اقولك

تجيبى معلقة كبيرة شطة بودر حارة مع نص معلقة بابريكا وتحليها بشوية مية
بعد كدة هتقطعى الفرخة 8 قطع
وتشيلى الهيكل والكبد والقوانص للسلق علشان الرز




بعد ما قطعنا نحقن قطع الفراخ بالشطة
تجيبى الحقنة وتشيلى الابرة ترميها وتحقنى بين العظم واللحم ازاى
هتجيبى اى طرف مدبب معلقة او سكينة وتعملى فتحة غويطة بين العظم واللحم
وتدخلى الحقنة وتحقنىيها شطة اوك

زى اللى ف الصورة دى





وميمنعش تحقنى تحت الجلد بس شوية صغيرين

ومش تنسى تحقنى الجناح كمان حلو اوى بصى اى مفصل يقابلك احقنية

بعد ما حقنا نعمل اية هه يالا نشوف

هنقطع فيلية صدور بالطول ونحطهم مع قطع الفراخ

اللى احنا حقناها شطة علشان هنعمل منها فيلية كرسبى للرز

وندخل شوية برضة جوة الرز هنبقى نشوف موضوع الرز دة

بس قطع الفيلية دى مش تحقنيها حاجة سبيها زى ما هي اوك






هنحط اللبن الرايب

وبعدها





اهم خطوة هنغلفها ونحطها فى الثلاجة لمدة لا تقل عن اربع ساعات اوك

والخطوة اللى بعدها هى الاهم بصوا كدة

هنطلعها من اللبن الرايب ونصفيها اوك





هنحضر التوابل دى

عدد 2 ملعقة كبيرة ملح
ملعقة صغيرة سكر
ملعقة صغيرة خل ابيض
و2 ملعقة ثوم بودر
ملعقة بصل بودر
قطعة جنزبيل فريش مقشر
ملعقة فلفل اسمر حب
و4 حبات قرنفل مسمار
و4 ورقات لورا وعود روز مارى

بعد كدة هنعمل اية

هنحط دة كلة فى المية المتلجة وعلى التلاجة عدل
لمدة اربع ساعات تانين
مش تزهقوا
بعد كدة
هنطلع الفرخة من مية التوابل
ونصفيها بعد ما الفراخ اتشبعت بالتوابل اوك كدة


نيجى بقى على القرمشة
واليكم السر الذى لم يعد سرا بعد الان اتفرجوا كدة




هنجيب الحاجات دى اللى هى اية بقى

ملعقه صغيره شطة حارة
ملعقه صغيره بابريكا
ملعقه صغيره ثوم بودر
ملعقه صغيره جنزبيل بودر
ملعقه صغيره فلفل اسمر مطحون
ملعقه صغيره ملح
ملعقه صغيره مشكلة من زعتر بودر على طرخون بودر على مردقوش بودر

ونحطهم على 3 كوب كبير دقيق ابيض
وهنعمل خلطة اسمها تمبورة بس هنا هتتعمل ازاى
مية متلجة اوى يستحسن يكون فيها تلج
مع 2 كوب دقيق ابيض
الطبق الاخير دة فية القرمشة اللى هتخلى الفراخ كنتاكى كنتاكى اوك
ودى هنعملها ازاى

هنجيب طبق فية دقيق ونشقشقة بشوية مية متلجة
وبعد كدة نفركة براحة بصوابعنا هتحسى انو قطع رقيقة كدة جوة الدقيق هتاخدى منة شوية

وتحطيهم فى مصفاة وترجيها علشان تتخلصى من الدقيق الزيادة

وترصيهم على ورقة والعملية دى بتتكرر كل شوية لانك بتحطى نقط مية على دقيق كتير وتحطيهم فى المصفاة وهكذا

بس معلومة مش تعملى كمية كبيرة من القرمشة

وتسبيها على طول تحطى الفراخ فى الدقيق

وبعد كدة سائل التمبور
وبعدين القرمشة كلة ورا بعضة
وبعدين فى الزيت مش تركنى حاجة والا كلة هيعجن
تعالى شوفى الصور دى كدة
فى الاول هوريكى القرمشة





نيجى للقلى





هنسخن الزيت على 160 درجة





وهنقلى نص قلي

والسر هنا انك تحطى الغطا

لانة لما بيتعرض للهوا بيتلون من برة بس مش بيستوى من جوة

والغطا عندى بيسمح بخروج البخار
لان برضة لو البخار اتكتم بيحرق الحاجة
بعد ما قلينا نص قلية اية اللى هيحصل





هناخد الفراخ ونحطها فى التلاجة علشان ترتاح والمية اللى جوة اللحم تتوزع فى الانسجة تانى

تتحط فى التلاجة مش اقل من ساعة
او ممكن تسبيها فى التلاجة ووقت ما تحبى تقلى منها خدى منها واقلى
بعد ما قعدت الوقت الكافى فى التلاجة نطلعها بقى علشان نقليها تانى

ودى اول قطعة





ودى بقى قطع الفيلية المقرمشة الحارة اللى هتتحط على الرز




نيجى بقى نعمل للرز

اولا الشوربة

عدد 2 معلقة ملح
معلقة فلفل اسمر حب
و3 بصلات مدبس فيهم قرنفل وورق لورا
معلقة حبهان

فاكرين طبعا الجزء اللى هنعمل منة الشوربة اللى هو
الرقبة والهيكل والكبد والقوانص






عملنا الشوربة

الرز ومكوناتة





ربع فيلية من اللى كان منقوع فى اللبن الرايب
معلقة شطة حارة
معلقة بابريكا
و3 بصلات متوسطين الحجم مقطعين قطع صغيرة
و2 فص ثوم متوسط مقطع قطع صغيرة
ملعقة صغيرة ملح
و1/2 كيلو رز
و2 ملعقة زبدة
و2 ملعقة صلصة حمراء مدوبين فى شوية مية


الطريقة

نحمر قطع اللحم فى الزبدة




ننشل قطع اللحم ونضع البصل لحد ما يدبل ونحط التوم

اول ما ريحة التوم تظهر حطى قطع الفراخ تانى وقلبى

وبعدين نحط الرز والتوابل ونقلب





وبعدين نحط الصلصة

وبعدين نحط الشوربة ونغطى ونسيبها على نار عالية لمدة دقيقتين
ونهدى النار خالص لمدة 12 دقيقة
دا ريزو مع صوص باربكيو




***--***--***--***--***--***--***--***


نقول البطاطس


كيلو بطاطس بتاع القلى
تاخدى البطاطس على طول تقشريها وتغسليها وتنقعيها فى مية ساقعة
ومعلقة خل لمدة ساعة تصفى البطاطس

وتنشفيها وتاخديها نص قلية وبعدين تفرزيها وتبقى تقلي منها وقت ما تحبى

***--***--***--***--***--***--***--***

نيجى لطريقة سلطة كول سلو





المكونات


ربع كرنباية
و2 جزر
و2 ملعقة سكر
بولا مية ساقعة
و2 ملعقة مايونيز
رشة ملح
رشة فلفل اسود
ملعقة خل ابيض

الطريقة

ننقع الكرنب والجزر فى المية والسكر لمدة لا تقل عن ساعة فى التلاجة
نقطعهم قطع صغيرة ثم
نخلط المايونيز والخل والملح والفلفل
ويفضل ان تبقى الكول سلو فى الثلاجة حتى يتركز الطعم اكثر واكثر



وبالهنا والشفا

إرسال تعليق

0 تعليقات