على فكرة لما تفصلي البياض عن الصفار
وتضربى كل حاجة لوحدها هتكون هشة اكتر
وعصير نص ليمونة على الصفار
هيضيع الزفارة بتاع البيض نهائى ويديها هشاشة اكتر مع الفانليا


*****************


المقادير

عدد 10 بيضات
و2 كوب ونص دقيق لو عايزه تعمليها بالشوكلاته شيلي ربع كوب دقيق وحطي مكانه ربع كوب كاكاو خام
و2 كوب سكر بودره
ملعقه صغيره فانيليا
ملعقة صغيره بيكنج بودر
ذرة ملح

الطريقه

السكر البودره واكسري عليه بيضه بيضه ومع كل بيضه تضربي بالمضرب
وبعد كده حطي الفانيليا انخلي الدقيق مع البيكنج بودر وذرة الملح وضيفيهم شويه شويه
واضربي بالمضرب لما تلاقي ان العجينه بقت لونها ابيض شويه
تعرفي انها كده تمام حطيها في صينيه مدهونه زبده ومتبطنه بسكر البودره ودخليها الفرن
طبعا لازم تكوني مسخنه الفرن قبلها ومتفتحيش عليها قبل ربع ساعه علشان متهبطش
لما تخرج من الفرن طلعيها من الصينيه على حاجه متفتحه زي منخل او هوايه سلك
علشان تبرد ومتهبطش معاكي وبعد كده قطعيها 3 حلقات مدوره
في ناس بتسقيها بعصير برتقال او عصير الكمبوت
اسقيها سفن اب بالمعقول علشان متعجنش منك النتيجه
والطعم هايله واحشيها واعمليها باللي انتي عيزاه بعد كده
*****************

أو

المقادير

عدد 10 بيضات
كوب وربع دقيق بس ربع مليان يعنى
كوب سكر ناعم او بودرة
فانيليا

الطريقة

تفصلى البياض عن الصفار وتحطى نص كوباية السكر مع البياض والنص التانى مع الصفار
وتبدأى تضربى كل واحد لوحده وطبعا معاهم الفانيليا
وبعصر كمان ليمونة عشان الزفارة بتاعة البيض تختفى تماما تفضلى تضربى الصفار فى اتجاه واحد عشان تمليها
هوا ما ينفعش تضربى فى كل اتجاه شوية هاتبوظ منك
ومش هاتنفش تفضلى تضربى لحد مايبقى لونة سمنى فاتح جدا وقوامه زى الكريمة
وبعد ما تخلصى تضيفيله 5 معالق مية بمعلقة الأكل العادية وتضربى تانى كمان شوية

تيجى بقه للبياض ومعاه السكر طبعا زى الصفار تمسحى المضرب من الخليط اللى عليه
وتضربى بيه البياض لحد ما ينفش خالص ويعمل معاكى منقار الحمامة
تقومى ضايفاله معلقة محسن كيك ومعلقة صغيرة من بتاعة الشاى خل أبيض وتضربى كمان شوية

بعد كده تضيفى الصفار على البياض بشويش وتقلبى من فوق لتحت
خلصتى جيبى الدقيق وشيلى منه معلقتين وحطى بدالهم معلقتين نشا
وضيفيه على الخليط شوية بشوية صغيرين وقلبى بمعلقه خشب بالراحة جدا من فوق لتحت
برده لحد ماتنتهى من كمية الدقيق وانا جربتها بالبودر ومن غير البودر وبتدى نفس النتيجة
لأن الأصل فى الكيكة الاسفنجية انها ما بتحتاجش بودر أصلا لو حبيتى يبقى ربع معلقة صغيرة

طبعا فرنك بتكونى مولعاه من وقت ما جيتى تحطى الدقيق مثلا
وخليه على أعلى درجة وخلى الشبكة بتاعة الفرن على تانى رف
وتحطى صينية مايه على أرضية الفرن عشان توزع الحرارة كويس فى الفرن كله
وما تتحرقش الكيك تصبى الكيك فى صينية مقاس 28 حرفها عالى ومتبطنه بسمن ودقيق
وتنزلى درجة حرارة الفرن ل 180 وتحطى الصينية على الشبكة على تانى رف
وتقفلى فرنك وتسيبيها من نص ساعة لساعة الا ربع ما افتحش قبل كده خالص يعنى لما تشمى ريحيتها
تفتحى فرنك بشويش ومايكونش فيه اى تيار هوا فى المطبخ
وبعد كده طلعيها وسيبيها تبرد خااالص واقسميها 3 دواير ورشرشى عليها عصير تفاح ودا أفضل حاجة
او مية كمبوت او اسبرايت او ماية بسكر بس خفيف مش كتير احسن تعجنيها