عايزة محشى ورق العنب يطلع معاكى مظبوط ومايفكش منك على النار
ويكون كله حجم واحد ؟
أولا : لما تيجى تسلقيه لازم تبقى نص سلقة يعنى تحطيه فى ميه مملحة بتغلى
ومتسيبهوش اكتر من دقيقتين عشان ما يتهريش منك
ثانيا : وانتى بتلفيه خلى الظهر الخشن هو اللى عليه الحشوة
والظهر الناعم هو اللى فى الخارج
ثالثا : خلى الحشوة فى النص بالظبط ووسطيها كويس
وخلى كل مرة نفس مقدار الحشوة عشان يطلع كله نفس الحجم
رابعا : متحطيش رز او حشوة كتير ومتخليش الرز كورة لا افرديه بيضاوى
خامسا : عشان ميتلسعش منك او يتحرق ويشيط
حطى فى ارضية الحلة ترانشات جزر او بطاطس او بصل او طماطم مع قليل من زيت الزيتون
وممكن تحطى العنقود اللى بتشيليه من ورق العنب وبطنى بيه الحلة وبعدين رضى ورق العنب
سادسا : لما تيجى ترصى ورق العنب فى الحلة عشان كله يبقى نفس السوا ومايفكش منك فيه طريقتين
ياترصيه على شكل دائرى او حلزونى
ياترصيه سطر بالطول فوقيه سطر بالعرض عكس اللى تحته
سابعا : لما تبدأى تسويه
حطى عليه شوربة يا دوب تكون مغطياه وحطى فوق المحشى طبق اصغر من مقاس الحلة
وطبعا يكون بيتحمل الحرارة واضغطيه على المشى حلو
وغطى عليه الطبق ده هيخليه مايفكش منك وهو بيستوى ونفس الفكرة مع محشى الكرنب
ثامنا : لما تغطى الحلة خللى النار عالية لحد الشوربة ما تبدأ تغلى اول ما تغللى وطى النار خاااااالص
تاسعا : اول ما صوت الشوربة يهدى خالص
ومايكونش فيه أى صوت اطفى عليه
عاشرا : بالنسبة للخلطة ماتخليش فيها أى سوايل يعنى سبكى الطماطم كويس
وصفى الأرز عشان تضمنى انه مايعجنش معاكى ويطلع الحبات مفلفلة
0 تعليقات