Seafood Mix

علي طريقة المطاعم واحلى ساندويش الـ Seafood Mix ( مأكولات بحريه مشكل بالموزاريلا )

المقادير

سبيط شرايح رفيعه اووي

جمبري بالحجم اللي تحبوه

صوابع كابوريا

بصل ابيض متقطع جوانح رفيعه

فلفل الوان متقطع زي البصل

م ص توم مفروم ناعم

م ص فلفل احمر مفروم

م ص بهارات سمك

١/٢ م ص بابريكا

عصير ١/٢ ليمونه

م ك زيت علي نار عاليا

ننزل السبيط ونقلب ٤ دقايق

بعد ال ٤ دقائق ننزل الجمبري ونقلب تاني ٣ دقائق

وبعد كدا ننزل البصل الاول تقليبه وبعده الفلفل الالوان وتقلبتين كمان

وننزل التوم والفلفل الاحمر و بهارات السمك والبابريكا ونقلب كويس دقيقتين تاني علشان الطعم كله يتجانس

اخر حاجه صوابع الكابوريا وخلوا بالكوا وانتوا بتقلبوا علشان ماتتهريش نطفي النار ونحط عصير الليمون

ندهن العيش صوص التارتار من فوق وتحت و نحط السيفود مكس اللي عملناه

والجبن الموزاريلا السايحه ع الوش - دي طريقتها

ف طاسة تيڤال هنحط الموزاريلا المبشوره عادي ونغطيها ونهدي النار خالص خالص

ولما تسيح كلها هندخلها تحت الشوايه تاخد لون وبس ناخد منها حتت ونحطها علي السيفود

وكوبايه بيبسي بقي نحبس بيها

وبالهنا والشفا